شنّ نجم الأهلي السابق عمرو الحديدي هجومًا حادًا على أداء الفريق الأول لكرة القدم، مُنتقدًا لاعبين وجهازًا فنيًا بقيادة الحسين عموتة، ومطالبًا بقرارات قوية لاستعادة شخصية الفريق المنافسة على البطولات.
انتقادات للاعبين وجهاز فني
قال الحديدي خلال مداخلة هاتفية ببرنامج «الماتش» عبر قناة «صدى البلد»: «أنا عايز أشوف الأهلي اللي بيجيب البطولات، مش الأهلي اللي بيقول مين بياخد أكتر من التاني.. رجعوا لي الأهلي من تاني، لأن اللي بيحصل حاليًا مش هو الأهلي اللي إحنا عارفينه».
طالب الحديدي بإخراج زيزو وإمام عاشور ومحمد هاني وياسين مرعي من حسابات الفريق «علشان يعرفوا قيمة النعمة اللي في إيديهم»، مؤكدًا ضرورة وجود قرارات قوية لأن «في لاعيبة محتاجة تحس بقيمة النادي اللي بتلعب له».
أداء عموتة وتكرار الأخطاء
وصف الحديدي أداء المدرب الحسين عموتة بأنه «لم يضف أي شيء للأهلي حتى الآن»، متسائلًا: «معقول الجهاز الفني مش معاه محلل أداء يقدر يحدد الأخطاء اللي الفريق بيقع فيها ويشتغل على تصحيحها؟» وشدد على أن «المفروض يكون فيه شغل واضح على المشاكل اللي بتظهر في الملعب، مش إن الأخطاء تتكرر من غير حلول».
رضا مشروط عن قائمة كيتارا
أبدى الحديدي رضاه عن قائمة الأهلي لمواجهة كيتارا الأوغندي في الكونفدرالية بنسبة 95%، لكنه طالب بإجلاس لاعبين كثيرين على الدكة «علشان تحس بالحرمان من النعمة اللي في إيديها، وتعرف إن المشاركة في الأهلي مش مضمونة لأي لاعب مهما كان اسمه».
اعتبر الحديدي أن عموتة «خايف يقعد كل اللاعبين المقصرين، لأنه ممكن يخشى إن القرارات دي تتسبب في إقالته»، مؤكدًا أن «المدرب لازم تكون عنده شخصية قوية، ويقدر يتخذ القرارات اللي تخدم الفريق، مش القرارات اللي تضمن له الاستمرار في منصبه».
تصرفات الجهاز الفني والجانب النفسي
قلل الحديدي من تصرفات عموتة قائلًا: «أنا بقلل من تصرفات عموتة، وبقول هو مين ده جنب وائل جمعة؟ إزاي تصرف بالشكل ده ومايتحطلوش حد؟ لازم يكون فيه حساب لأي تصرف يتجاوز حدود المقبول».
اختتم بالتأكيد على أهمية الجانب النفسي: «إزاي المدرب مش قادر يحتضن اللاعيبة ويحتويهم علشان يطلع أفضل ما عندهم؟ المدرب مش دوره فني بس، لكن لازم يعرف يتعامل مع اللاعبين ويكسبهم ويحفزهم، وفي الوقت نفسه يحاسب المقصر. الأهلي محتاج شخصية فنية تقدر ترجع للفريق قوته وتخليه ينافس على البطولات من جديد».
