احتفلت نور محمود الخطيب، ابنة الكابتن محمود الخطيب رئيس النادي الأهلي، بعيد ميلاد والدها عبر حسابها الشخصي على موقع التواصل الاجتماعي «فيسبوك»، حيث نشرت مجموعة من الصور التي تجمعها به، وأرفقتها برسالة معبرة عن حبها واعتزازها به.
رسالة نور الخطيب لوالدها في عيد ميلاده
كتبت نور الخطيب في رسالتها: «كل سنة زي النهارده ببقى نفسي أكتبلك كلام كتير وأعبرلك عن كل حاجة جوايا، وكل مرة بحس وأنا بكتب إن اللي جوايا أكتر بكتير من مليون كلمة ممكن أقولها.. بحس إنك أحلى فكرة وأحلى وصف وأحلى إحساس بعيشه».
وأضافت: «وإن وجودك في حياتنا نعمة كبيرة أدركتها من وأنا صغيرة، مش علشان الناس كلها بتحبك، ولكن علشان طاقة الحب والسلام والأمان اللي جواك بتخلي كل حاجة أحلى، وبتدينا كل يوم ألف سبب نحب الدنيا أكتر ونعدي أي حاجة صعبة».
وتابعت واصفة تفاصيل علاقتها به: «في أصغر تفاصيلك بحبك أكتر.. في اليوم العادي، والكلمة اللي بتقولها في أكتر وقت الواحد محتاجها، والنظرة اللي بتحضن من غير كلام، والنصيحة اللي بترد على السؤال قبل ما يتسأل، وطريقتك اللي بتحلي أي حاجة وأي وقت».
واستكملت حديثها عن صفاته: «في هزارك اللي بيجي في وقته، ورأيك اللي دايمًا بيحل بهدوء، وإحساسك بالناس، وابتسامتك الطيبة مع الغريب والقريب، وقلبك اللي عمره ما اتغير مهما الدنيا والناس اتغيروا».
ختمت رسالتها بالدعاء له
اختتمت نور محمود الخطيب رسالتها قائلة: «زي النهارده ربنا كتبلي أحلى قدر.. كل سنة وحضرتك المثال والدليل إن الواحد انعكاس للخير والحب اللي جواه.. كل سنة وحضرتك جميل وطيب وأحلى واحد في الدنيا.. كل سنة وأنت حبيب الكل وحبيبي.. كل سنة وأنت الحلم اللي أنا بعيشه كل يوم».
